ഇന്ത്യയും അമേരിക്കയും തമ്മിലുള്ള വ്യാപാര ചർച്ചകളിൽ ഗണ്യമായ പുരോഗതി കൈവരിച്ചിരിക്കുന്നു! കേന്ദ്ര വാണിജ്യ വ്യവസായ മന്ത്രി പിയൂഷ് ഗോയലിന്റെ വാക്കുകൾ വിശ്വസിക്കാമെങ്കിൽ, ഈ സുപ്രധാന വ്യാപാര കരാർ സമീപഭാവിയിൽ തന്നെ യാഥാർത്ഥ്യമാകും. നവംബറിൽ തന്നെ കരാർ ഒപ്പിട്ടേക്കുമെന്ന പ്രതീക്ഷയിലാണ് വാണിജ്യ ലോകം.
ഈ കരാർ ഇന്ത്യൻ ഓഹരി വിപണിക്ക് ഒരു ഉണർവ് നൽകുമെന്ന കാര്യത്തിൽ സംശയമില്ല. യു.എസ്. പ്രസിഡന്റ് ഡോണൾഡ് ട്രംപ് ഇന്ത്യയ്ക്കുമേൽ ചുമത്തിയ അധിക തീരുവകൾ ഒഴിവാകും എന്നതാണ് ഏറ്റവും പ്രധാനപ്പെട്ട അനുകൂല ഘടകം.
ട്രംപിന്റെ അധിക തീരുവകൾ കാരണം പ്രതികൂലമായി ബാധിച്ച ടെക്സ്റ്റൈൽസ്, സമുദ്രോൽപന്നങ്ങൾ, ഇലക്ട്രോണിക്സ് ഉൽപ്പന്നങ്ങൾ, സ്മാർട്ട് ഫോൺ, ആഭരണങ്ങൾ, ഫാർമ തുടങ്ങിയ നിർണ്ണായക മേഖലകൾക്ക് ഈ കരാർ ഒരു 'അമൃത'മാകും. കരാർ യാഥാർത്ഥ്യത്തിലേക്ക് അടുക്കുന്നുവെന്ന സൂചന വന്നപ്പോൾ തന്നെ ഈ മേഖലകളിലെ കമ്പനി ഓഹരികളിൽ കുതിപ്പ് ദൃശ്യമായിക്കഴിഞ്ഞു.
എന്തുകൊണ്ട് ഈ കരാർ നിർണ്ണായകം?
തീരുവ ഒഴിവാക്കൽ മാത്രമല്ല, കരാറിലെ വ്യവസ്ഥകളാണ് വിപണിയെ സ്വാധീനിക്കുന്ന മറ്റ് ഘടകങ്ങൾ. യു.എസ്. ഉൽപ്പന്നങ്ങൾക്കായി ഇന്ത്യൻ വിപണി എത്രത്തോളം തുറന്നു കൊടുക്കുന്നു എന്നതിനെ ആശ്രയിച്ചിരിക്കും ചില ഇന്ത്യൻ കമ്പനികളുടെ ഭാവി. ആഭ്യന്തര കമ്പനികൾക്ക് ഇത് തിരിച്ചടിയാകാൻ സാധ്യതയുണ്ട്.
ഇന്ത്യൻ ഓഹരി വിപണി ഒരു വൻ മുന്നേറ്റത്തിന് തയ്യാറെടുക്കുകയാണെന്നും, ഇന്ത്യ-യു.എസ് വ്യാപാര കരാർ പ്രഖ്യാപനം ഈ കുതിപ്പിന് തുടക്കമിടുമെന്നും സമൂഹ മാധ്യമങ്ങളിലെ 'വിദഗ്ധ വിശകലനങ്ങൾ' ഉറപ്പിച്ചു പറയുന്നു.
എന്നാൽ, ജാഗ്രത പാലിക്കുക!
ഇത്തരം വാർത്താധിഷ്ഠിത മുന്നേറ്റങ്ങൾക്ക് ഏതാനും ദിവസത്തെ ആയുസ്സേ ഉണ്ടാകൂ എന്ന് നിക്ഷേപകർ ഓർക്കണം. ഇന്ത്യൻ വിപണി ഇപ്പോഴും 'അമിത മൂല്യം' (Overvalued) എന്ന അവസ്ഥയിലാണ്. വിപണി ന്യായമായ നിലവാരത്തിലേക്ക് തിരുത്തപ്പെടുകയോ, കോർപ്പറേറ്റ് വരുമാനത്തിൽ ഗണ്യമായ വർദ്ധനവ് ഉണ്ടാവുകയോ ചെയ്യാതെ, അടുത്ത ഒരു സുസ്ഥിര മുന്നേറ്റം പ്രതീക്ഷിക്കരുത്. ദീർഘകാല നിക്ഷേപത്തിന്, കമ്പനികളുടെ സാമ്പത്തിക ഭദ്രത, ലാഭക്ഷമത, ഭാവി സാധ്യതകൾ എന്നിവ തന്നെയാണ് മുഖ്യം.
സൂചികയിലെ 'വിരോധാഭാസം'
ഇന്ത്യൻ ഓഹരി വിപണി സൂചിക എക്കാലത്തെയും ഉയർന്ന നിലവാരത്തിന് തൊട്ടടുത്താണ്. 'ബുൾ റൺ' (മുന്നേറ്റ കാലം) വന്നെത്തിയെന്ന് പലരും പറയുന്നു. എന്നാൽ, സൂചിക കുതിക്കുമ്പോഴും സാധാരണ നിക്ഷേപകരുടെ പോർട്ട്‌ഫോളിയോയിൽ അതിനനുസരിച്ചുള്ള മുന്നേറ്റം കാണുന്നില്ല എന്നതാണ് സമീപകാല പ്രതിഭാസം.
ആഭ്യന്തര നിക്ഷേപ സ്ഥാപനങ്ങൾ (DIIs) ഹെവി വെയ്റ്റേജ് ബ്ലൂ ചിപ്പ് ഓഹരികളിൽ ആസൂത്രിതമായി വാങ്ങൽ നടത്തി സൂചികയെ താങ്ങിനിർത്തുകയാണ്. സിസ്റ്റമാറ്റിക് ഇൻവെസ്റ്റ്മെന്റ് പ്ലാനുകളിലൂടെ (SIP) എല്ലാ മാസവും ഒഴുകിയെത്തുന്ന കോടികളാണ് ഇതിന് അവരെ സഹായിക്കുന്നത്.
സൂചികയിൽ വൻ വീഴ്ചയുണ്ടായാൽ സാധാരണ നിക്ഷേപകരുടെ ആത്മവിശ്വാസത്തെയും എസ്.ഐ.പി. നിക്ഷേപത്തെയും അത് ബാധിക്കും. ഇത് ഒഴിവാക്കാനാണ് ആഭ്യന്തര നിക്ഷേപ സ്ഥാപനങ്ങൾ വ്യവസ്ഥാപിതമായി കരുക്കൾ നീക്കുന്നത്. ഒക്ടോബർ തുടക്കം മുതൽ വിദേശ നിക്ഷേപ സ്ഥാപനങ്ങൾ (FIIs) വിൽപനയുടെ തോത് കുറച്ചതും വിപണിക്ക് കരുത്തായി. പല ദിവസങ്ങളിലും അവർ ചെറിയ തോതിലെങ്കിലും വാങ്ങലുകാരായി.
മുന്നോട്ടുള്ള പാത:
എങ്കിലും, എക്കാലത്തെയും ഉയർന്ന നിലവാരത്തിന് തൊട്ടടുത്തുനിന്ന് സൂചികയെ വിദേശ നിക്ഷേപ സ്ഥാപനങ്ങൾ അടുത്തയാഴ്ച വലിച്ച് താഴെയിടാൻ സാധ്യതയേറെയാണ്. വിപണിയിൽ ചാഞ്ചാട്ടം ശക്തമായിരിക്കും. അതിനാൽ, അടുത്ത രണ്ടുമാസം സാധാരണ നിക്ഷേപകർക്ക് വെല്ലുവിളിയാകും. കരുതലോടെ നീങ്ങുക!